Ahmedabad Startup Of Healthy Sweets By Mother Daughter Unique

By Nisha Jansari

September 14, 2021

યુકેથી પરત ફર્યા બાદ ધરાએ કૉર્પોરેટ નોકરી કરવાની જગ્યાએ પોતાનો વ્યવસાય કરવાનું નક્કી કર્યું અને મિઠાઈઓમાં થઈ ભેળસેળ અને લોકોની સુગરની વધતી જતી સમસ્યા જોઈ શરૂ કર્યું કસ્ટમાઈઝ્ડ મિઠાઈઓ બનાવવાનું. આજે સંખ્યાબંધ ગ્રાહકોની છે પહેલી પસંદ

આજે અમે વાત કરી રહ્યા છે અમદાવાદની એક માતા-પુત્રીની જોડીની, જેઓ ઘરે જાતે જ, લોકોના સ્વાદ અને સ્વાસ્થ્ય અનુસાર મિઠાઈઓ બનાવી આપે છે અને સારી કમાણી પણ કરી રહ્યાં છે. એકવાર તેમની મિઠાઈ ખાધા બાદ તે નિયમિત તેમની પાસે જ આવે છે, જેના કારણે તહેવારોના સમયમાં તો માતા-પુત્રી આખો દિવસ વ્યસ્ત રહે છે, છતાં ક્યારેય ગુણવત્તા કે સ્વાદમાં સમાધાન નથી કરતા, અને આ જ તેમની ખૂબી પણ છે.

અમદાવાદ નવરંગપુરા વિસ્તારમાં રહેતી ધરા કાપડિયાએ યુકેમાં ક્લિનિકલ રિસર્ચમાં માસ્ટર્સ ડિગ્રી મેળવી છે. ત્યાં ભણી થોડો સમય નોકરી કર્યા બાદ ધરા વતન પાછી ફરી અને પોતાનો આ નવો વ્યવસાય શરૂ કર્યો.

Similar Story

શહેરમાં લેપટોપની આસપાસ ફરતી જીંદગી છોડી પહાડો ઉપર નાખ્યો ડેરો, શરૂ કરી દેવભૂમિ નર્સરી

સચિન કોઠારી કોર્પોરેટ જોબ છોડીને દહેરાદૂન જઈ શરૂ કરી દેવભૂમિ નર્સરી, આજે ફૂલો અને શાકભાજીનાં 20થી વધારે જાતનાં છોડ વેચે છે

ધરા ભારત આવી કૉર્પોરેટ નોકરી કરવા નહોંતી ઈચ્છતી એટલે તેણે લોકોને રસાયણ રહિત ઉત્પાદનો ખવડાવવા માતા સાથે મળીને મેંગો જંક્શનની શરૂઆત કરી. માતા અમિતાબેન અત્યારે 65 વર્ષની ઉંમરે પણ દીકરી સાથે ખભેખભો મિલાવી હોંશેહોંશે કામ કરી રહ્યાં છે.

શરૂઆત કરી મેંગો જંક્શનની
વર્ષ 2017 માં તેમણે મેંગો જંક્શનની શરૂઆત કરી ત્યારે તેઓ ઉનાળામાં ખેડૂતો પાસેથી કાર્બાઈડ ફ્રી કેસર અને રત્નાગીરી હાફૂસ કેરી લાવી તેને લોકો સુધી પહોંચાડતા. આ દરમિયાન ધીરે-ધીરે તેમને ધ્યાનમાં આવ્યું કે, બજારમાં મળતી મીઠાઈઓમાં ગળપણનું પ્રમાણ વધુ હોય છે, જેથી ઘણા લોકો તો તેને સ્વાસ્થ્ય કારણોસર ખાઈ પણ નથી શકતા, તો વારંવાર તેમાં ભેળસેળના દાખલા પણ ધ્યાને આવતાં તેમણે ઘરે મિઠાઈ બનાવી તેનું આકર્ષક પેકિંગ કરી લોકો સુધી પહોંચાડવાનું નક્કી કર્યું.

ધરા અને અમિતાબેને 2019 માં તેમના દાદીની રેસિપિથી મથુરાના પેંડા ઘરે બનાવી લોકો સુધી પહોંચાડવાનું શરૂ કર્યું હતું. તો આ બે વર્ષના સમયમાં તેમની પાસે લગભગ 20 જેટલી મિઠાઈઓ મળી રહે છે.

પોતાના કામ અંગે ધ બેટર ઈન્ડિયા સાથે વાત કરતાં ધરા જણાવે છે, “વિદેશમાં રહીં ભણ્યા બાદ મને માર્કેટિંગની ઘણી સ્કીલ્સ અંગે ખબર પડી અને તેનો જ ઉપયોગ મેં અહીં પણ કર્યો. અમે જ્યારે કાર્બાઈડ ફ્રી કેરીનો વ્યવસાય શરૂ કર્યો ત્યારે શરૂઆતમાં અખબારમાં જાહેરાત આપી હતી અને વિવિધ સોશિયલ મીડિયામાં પણ લોકો સુધી અમારી વાત પહોંચાડી હતી. તે જ ગ્રાહકોને અમે અમારા વૉટ્સએપ ગૃપમાં પણ જોડ્યાં અને તેમના સુધી અમારી મિઠાઈની વાત પણ પહોંચાડી. પછી તો જે-જે લોકો એકવાર અમારી મિઠાઈ ખાય તેઓ બીજા લોકોને કહે છે અને અમારા ગ્રાહકો આમ વધતા જાય છે.”

કસ્ટમાઈઝ્ડ સ્વીટની ઓફર
તેઓ ગ્રાહકની માંગ અનુસાર મિઠાઈ બનાવી આપે છે. જો ગ્રાહકને સુગરલેસ મિઠાઈ જોઈતી હોય તો તેને જરા પણ ખાંડ વગરની મિઠાઈ બનાવી આપે છે, તો કોઈ ગ્રાહક ઓછા ગળપણવાળી મિઠાઈ માંગે તો તેને એ અનુસાર બનાવી આપે છે. જો કોઈ ગ્રાહક વરખ વગરની મિઠાઈ માગે તો તેઓ તેને ઉપર વરખ લગાવ્યા વગર જ આપે છે. જો કોઈ ગ્રાહકને સામાન્ય સ્વાદ જોઈતો હોય તો તેને તે અનુસાર પણ બનાવી આપે છે.

આ ઉપરાંત તેઓ ડ્રાયફ્રુટ બૉલ અને ડ્રાયફ્રુટ જંક્સ પણ બનાવે છે. જેમાં તેઓ ખાંડ કે ગોળનો જરા પણ ઉપયોગ નથી કરતા. ખજૂરની મદદથી બનાવે છે. આ ઉપરાંત તેમાં ઘી કે તેલનો ઉપયોગ પણ નથી કરતા, જેથી બાળકોથી લઈને ડાયટ કૉન્શિયસ લોકો પણ તેને હોંશે-હોંશે ખાઈ શકે છે.

દેશ-વિદેશમાં પહોંચી તેમની મિઠાઈ
અત્યારસુધીમાં તેઓ અમદાવાદ, મુંબઈ, બરોડા, સુરત, ચેન્નઈ, નાસિક, કેરળ અને ચંડિગઢ સહિત દેશનાં ઘણાં શહેરોમાં તેમની મિઠાઈ પહોંચાડી ચૂક્યાં છે. આ ઉપરાંત તેઓ યુકે સુધી પણ તેમની મિઠાઈ પહોંચાડી ચૂક્યાં છે.

જેમાં તેઓ કાજુ કતરી, સુગરફ્રી ડ્રાયફ્રુટ ચંક્સ, મથુરાના પેંડા, ફ્રેશ ચૉકલેટ વૉલનટ ફજ, કોકોનટ બૉલ, ચટપટ્ટા નટ્સ, શેકેલા સૂકામેવા, સૉલ્ટ/બ્લેક પીપર નટ્સ સહિત અનેક મિઠાઈઓ મળી શકે છે. જેને તમે જાતે જઈને પણ ખરીદી શકો છો અને ઘરે ડિલિવરી પણ મેળવી શકો છો. અમદાવાદમાં તેઓ થર્ડ પાર્ટી ડિલિવરી મારફતે ગ્રાહકો સુધી પહોંચાડે છે, તો અન્ય શહેરો અને રાજ્યમાં તેઓ કુરિયર મારફતે ગ્રાહકની પસંદ અનુસારની મિઠાઈ બનાવીને મોકલે છે.

તેમની મિઠાઈઓ બાબતે તેમનાં ગ્રાહક સ્વેતા ઠક્કર જણાવે છે કે, મેંગો જંક્શનની બધી જ મિઠાઈઓમાં ખાંડ પ્રમાણસર હોય છે અને સ્વાદ ખૂબજ સરસ હોય છે. તેમાં ઉપયોગમાં લેવામાં આવતી સામગ્રીની ગુણવત્તા પણ એટલી જ ઉત્તમ હોય છે. તો અન્ય એક નિયમિત ગ્રાહક કુંતલ શાહ જણાવે છે કે, હું મેંગો જંક્શનની વિવિધ મિઠાઈઓ નિયમિત ખરીદતો આવ્યો છું. તેમની દરેક મિઠાઈ અદભુત હોય છે. તેમાં પણ મથુરા પેંડા, કેસર પેંડા, માવા પેંડા, સુગર ફ્રી ડ્રાયફ્રુટ્સ બૉલ, કોકોનટ બૉલ્સ, કાજુ કતરી ઉપરાંત ચોકલેટ ફજ ખરેખર અદભુત હોય છે.

Similar Story

અયોધ્યાના વેદ કૃષ્ણા શેરડીના અવશેષમાંથી કપ-પ્લેટ બનાવે છે, બિઝનેસ છે 300 કરોડનો

અયોધ્યાના રહેવાસી વેદ કૃષ્ણે તેમના પિતાના અવસાન પછી 'યશ પક્કા'ની બાગડોર સંભાળી હતી. તેમણે શેરડીના વેસ્ટમાંથી કપ-પ્લેટ બનાવીને ખેડૂતો અને પર્યાવરણ બંનેને ફાયદો કરાવ્યો છે.

Similar Story

સુરતના આ ભાઈની Chai Bike ની પહેલ છે એકદમ અનોખી, પીરસે છે ચા સાથે અલગ અલગ નાસ્તાઓ પણ

પહેલાંથી જ એક કહેવત છે કે આપણા ગુજરાતીઓ વ્યાપાર કરવા માટે કંઈક અલગ નુસખો ગોતી જ કાઢતા હોય છે ભલે ને પછી તે વ્યાપાર બીજા ઘણા બધા લોકો દ્વારા જ કેમ ના કરવામાં આવતો હોય.