આ સૃષ્ટિએ આપણને ઘણું આપ્યું છે, જેનું ઋણ આપણે વધુને વધુ વૃક્ષો અને છોડ ઉગાડીને જ ચૂકવી શકીએ છીએ. પટનાના અનિલ પોલ પણ આવી જ વિચારસરણી સાથે બાગકામ કરે છે. શહેરના ઝડપી ગતિશીલ જીવનમાં, થોડા લોકો છોડ રોપીને તેમની સંભાળ રાખવામાં સક્ષમ છે. પરંતુ અનિલે તેના એપાર્ટમેન્ટના ટેરેસ પર એવી સુંદર ઇકો-સિસ્ટમ બનાવી છે, જ્યાં લોકોને હરિયાળી અને પક્ષીઓનો સાથ બંને મળે છે.
અહીં તેમણે ફળો, ફૂલો અને શાકભાજીના સેંકડો વૃક્ષો અને છોડ ઉગાડ્યા છે. આજથી 30 વર્ષ પહેલા, જ્યારે તેઓ આ એપાર્ટમેન્ટમાં રહેવા આવ્યા હતા, ત્યારે તેમને તેમના જૂના ઘરનો બગીચો છૂટી જવાનું ખૂબ જ દુખ થયું હતું. પણ કહેવત છે કે જ્યાં ચાહ હોય તો ત્યાં રાહ! તેણે માત્ર પોતાનો શોખ જ પૂરો ન કર્યો, પણ બીજાને બાગકામ કરતા પણ શીખવ્યું હતું. હવે ઘણા લોકો તેમના એપાર્ટમેન્ટમાં કેટલાક છોડ ઉગાડી રહ્યા છે.
ધ બેટર ઇન્ડિયા સાથે વાત કરતા તે કહે છે, “જેઓ પ્રકૃતિને ચાહે છે તેઓ સૌને પ્રેમ કરી શકે છે. એટલું જ નહીં, તમે બાગકામ કરીને તમારા ઘરના ભીના કચરાનું સંચાલન પણ કરી શકો છો.”
સોસાયટીની છતને બનાવ્યુ ગાર્ડન
વ્યવસાયે ફિલ્મ અને સીરીયલ ડાયરેક્ટર અનિલ ઘણી વખત તેમના ટેરેસ પર તેમની સિરિયલો માટે નાના દ્રશ્યો શૂટ કરે છે. ફિલ્મ ઉદ્યોગ સાથે સંકળાયેલા તેમના ઘણા મિત્રો પણ તેમના શૂટિંગમાં તેમના ટેરેસની હરિયાળીનો ઉપયોગ કરે છે. સાથે જ આ બગીચો સમાજના લોકો માટે શાંતિથી સમય પસાર કરવા માટેનું પ્રિય સ્થળ બની ગયું છે. જ્યારે તેમણે અહીં રોપા ઉગાડવાનું શરૂ કર્યું ત્યારે ઘણા લોકોએ વાંધો ઉઠાવ્યો હતો. પરંતુ અનિલ કહે છે, “અમારી સોસાયટીમાં રહેતા ઘણા લોકો હવે નિવૃત્ત થઈ ગયા છે અને સાંજનો સમય પસાર કરવા માટે ઉપર ગાર્ડનમાં આવે છે. આ જોઈને મને ખૂબ આનંદ થાય છે.”
તેમના એપાર્ટમેન્ટનું આખું ટેરેસ લગભગ 4800 ચોરસ ફૂટ છે, જેમાંથી તેણે 1000 ચોરસ ફૂટનો ઉપયોગ કરીને છોડ વાવ્યા છે. અનિલે જમીનથી બે ફૂટ ઉપર બેડ બનાવીને કેટલાક છોડ ઉગાડ્યા છે. તો, કેટલાક છોડ કુંડા અથવા ગ્રો બેગ્સમાં ઉગાડવામાં આવ્યા છે. તેમણે કેટલાક સુશોભન છોડ સાથે શરૂઆત કરી હતી. આ પછી, તેમણે મોસમી શાકભાજી અને ફળો પણ ઉગાડવાનું શરૂ કર્યું.
બગીચામાં ઘણા દુર્લભ છોડ લાગેલા છે
અનિલ, દેશ અને વિદેશમાં જ્યાં પણ જાય છે, ત્યાંથી નવા છોડ કે બીજ લાવતા રહે છે. આજથી ત્રણ વર્ષ પહેલા તેમની બહેને તેને વૈજંતીમાલાના બીજ આપ્યા હતા. તેમણે આ બગીચામાં તેના બીજ રોપ્યા અને લગભગ ત્રણ મહિના પછી તે બીજમાંથી છોડ પણ અંકુરિત થયો.
ફળોમાં, તેમની પાસે બેંગકોકથી લાવેલાં કાળા જામફળ, બોર, ચીકૂ, નારંગી, દાડમ, સ્ટ્રોબેરી વગેરેના વૃક્ષો છે. તેમણે નાગપુરથી લાવેલો નારંગીનો છોડ પણ રોપ્યો હતો. જ્યારે તે નાગપુર નર્સરીમાંથી આ પ્લાન્ટ લાવી રહ્યા હતા, ત્યારે તેમને નર્સરીના ભાઈએ કહ્યું કે તે બિહારના તાપમાનમાં તે ઉગશે નહીં. પરંતુ ત્રણ વર્ષની સખત મહેનત પછી, આ વર્ષે તેમના છોડમાં આખરે ફળો ઉગી આવ્યા છે.
આ ઉપરાંત, તેમના ગાર્ડનમાં ઈલાયચી, પાન, તુલસી, લેમન ગ્રાસ,મીઠો લીમડો, તેજ પત્તા, અજમો, હળદર, આદુ, લસણ જેવા મસાલા અને ઔષધિઓ પણ લાગેલી છે.
તેમના ટેરેસ પર દરરોજ ચકલીઓ, પોપટ, બુલબુલ, હમિંગ બર્ડ જેવા ઘણા પક્ષીઓ આવે છે. તેમણે ખાસ કરીને ચકલીઓને આકર્ષવા માટે મહેંદીનો છોડ લગાવ્યો છે.
તમને તેમના બગીચામાં ગુલાબ, ગલગોટા, જાસૂદ જેવા ફૂલોના છોડ સહિત ઘણા દુર્લભ ફૂલો પણ દેખાશે. જેમાં સુંદર પક્ષીના આકારના ફૂલો, બર્ડ ઓફ પેરેડાઇઝ, બ્લીડીંગ હાર્ટ અને હિન્દુ માન્યતામાં વિશેષ સ્થાન ધરાવતા શમીનાં ફૂલોનો સમાવેશ કરવામાં આવ્યો છે.
અનિલ પાસે 18 વર્ષ જૂનું એડેનિયમ બોંસાઈ છે, જો તેઓ તેને વેચવા ઈચ્છે તો હજારો રૂપિયા આપીને લોકો તેને ખરીદવા માટે તૈયાર થઈ જશે.
ભીનો કચરો 20 વર્ષથી ઘરની બહાર ગયો નથી
અનિલ માત્ર બાગકામ જ નથી કરતા, પણ બીજાને બાગકામ શીખવે છે. તેમનું પોતાનું ખાનગી ટેરેસ ન હોવાથી, તેમને શરૂઆતમાં છોડની સંભાળ રાખવામાં મુશ્કેલી પડતી હતી. તેઓ કહે છે, “ક્યારેક લોકો અડધા કાચા ફળો, લીંબુ વગેરે તોડીને લઈ જતા, તો ફૂલોની કળીઓ તોડી નાખતા હતા. પરંતુ ધીમે ધીમે લોકો મને છોડ વિશે પૂછવા લાગ્યા. પછી ઘણા લોકોએ પોતાના છોડ રોપવાનું શરૂ કર્યું. હવે દરેકનાં ઘરની છત પર કેટલાક છોડ છે.”
આ સિવાય અનિલ લોકોને કમ્પોસ્ટિંગ કરવાનું પણ શીખવે છે. તેમનું કહેવું છે કે મોટા શહેરોમાં કચરો વ્યવસ્થાપન સૌથી મોટો પડકાર છે. આવી સ્થિતિમાં, જો દરેક વ્યક્તિ બગીચો બનાવે અને તેના માટે ઘરે ખાતર તૈયાર કરે, તો એક સાથે બે -બે સમસ્યાઓ હલ થશે. તેમણે 20 વર્ષથી ઘરની બહાર કોઈ ભીનો કચરો ફેંક્યો નથી.
તેમની પત્ની પણ તેમના બાગકામના કામમાં તેમને ઘણો સાથ આપે છે. બંને મોસમી શાકભાજી લગાવવા અને છોડને પાણી આપવા જેવા કામ કરે છે.
તેમના ઘરમાં પણ 50 જેટલા ઇન્ડોર પ્લાન્ટ છે. બાથરૂમમાં કેટલાક ઓછા પ્રકાશના છોડ છે, અને રસોડામાં ધાણા, પાલક અને ફુદીનો વગેરે લાગેલા છે.
આશા છે કે અનિલના બાગકામની કહાની વાંચીને તમને પ્રેરણા મળી હશે. તમે બાગકામ સંબંધિત કોઈપણ માહિતી માટે 9430832808 પર તેમનો સંપર્ક કરી શકો છો.
હેપી ગાર્ડનિંગ!
મૂળ લેખ: પ્રીતિ ટૌંક
સંપાદન: નિશા જનસારી
આ પણ વાંચો: આ કપલે પક્ષીઓ માટે સમર્પિત કરી દીધી 2 એકર જમીન, આવે છે 93 પ્રકારનાં હજારો પક્ષીઓ
જો તમને આ લેખ ગમ્યો હોય અને જો તમે પણ તમારા આવા કોઇ અનુભવ અમારી સાથે શેર કરવા ઇચ્છતા હોય તો અમને gujarati@thebetterindia.com પર જણાવો, અથવા Facebook અમારો સંપર્ક કરો.સકારાત્મકતાની ઝુંબેશ આગળ વધારવામાં અમને મદદ કરો
